2024 Avroviziya Mahnı Müsabiqəsi öz qalmaqalları ilə tarixin səhifələrinə qovuşdu. Müsabiqə ərzində davam edən qalmaqallarla birlikdə komandamızın ötən həftə aldığı müsahibələrindən biri də yunan mediasının müzakirə mərkəzində oldu.

Müsabiqə ərzində hazırladığımız reportajlar ümumilikdə 1,5 milyon izlənmə sayına çatdı. Habelə, Türkiyə və Yunanıstan liderlərinin bir araya gəldiyi bir zamanda komanda üzvümüz Elmiranın İsveçin Malmö şəhərində Yunanıstan təmsilçisi Marina Sattinin rəqqasları ilə aldığı müsahibə də diqqətləri öz üzərinə çəkdi. Müsahibədə rəqqasların özlərini Trakiya türkü adlandırmaları yunan mediasını qəzəbləndirdi. Buna səbəb isə Yunanıstanda yaşayan türk toplumuna ayrıca etnik azlıq statusunun verilməməsi və türklərin yunan müsəlmanları olaraq təsnif edilməsi olub. Bu da öz növbəsində on illərdir davam edən türk-yunan böhranı yenidən gündəmə gətirib. Elmiranın Azad Azərbaycan Televiziyasına “Xəbərin olsun” verlişində verdiyi müsahibədə də bu və digər müsabiqə ilə əlaqəli məqamlara toxunulub. Elmira habelə Azərbaycanın müsabiqədəki növbəti uğursuzluğu, ölkə təmsilçisinin çıxışının izləyiciləri cəlb etməməsi, birinci yarımfinal və onun təhlili kimi məqamları da televiziya izləyicilərinin diqqətlərinə çatdırıb.